Alls hafa 230 hlauparar skráð sig til leiks í Domino's hlaupið í fyrramálið. Þar af ætla 23 að hlaupa maraþon. Hlaupið er sárabót fyrir hlaupara eftir að Reykjavíkurmaraþonið sem átti að fara fram í lok ágúst var fellt niður.
Ívar Páll Jósafatsson, einn af skipuleggjendum hlaupsins, segir þátttökuna mjög góða miðað við lítinn fyrirvara. Frítt er í hlaupið en Domino's greiðir fyrir þátttökuna.
Hlaupið er með flögu og geta hlauparar fengið tímann skráðan.
Hlaupin verður sama leið og í vormaraþoninu.
Flestir, eða 106, ætla að hlaupa 10 km. Þá ætlar 101 að fara hálfmaraþon og sem fyrr segir 23 að hlaupa maraþon.
Nánari upplýsingar um hlaupið má finna hér.