Íbúar á Hlíð í öðru sæti í alþjóðlegri hjólakeppni milli hjúkrunarheimila

Hjördís Kristjánsdóttir einn liðsmanna í silfurlið Hlíðar. Hún er frá …
Hjördís Kristjánsdóttir einn liðsmanna í silfurlið Hlíðar. Hún er frá Bjarnarstöðum í Bárðardal og bjó lengst af í Lundarbrekku. Hún var dugleg að mæta í salinn til að hjóla og kveðast hafa lagt að baki um 450 kílómetra þann tíma sem keppni stóð yfir. mbl.is/Margrét Þóra

Íbúar á Hlíð á Akureyri gerðu sér lítið fyrir og náðu öðru sæti í alþjóðlegri hjólakeppni milli hjúkrunarheimila. Keppnin heitir Road Worlds for Seniors og er þetta í fjórða sinn sem Akureyringar taka þátt í henni. Norska fyrirtækið Motitech stendur á bak við keppnina og tóku 240 lið þátt frá 11 löndum.

Sverrir Valdimarsson, til hægri, Einar Sigfússon, Þorbjörg Elíasdóttir og Árni …
Sverrir Valdimarsson, til hægri, Einar Sigfússon, Þorbjörg Elíasdóttir og Árni Þorsteinsson hjóla af kappi og Ásta sjúkraþjálfari er ekki langt undan.

Gullið fór til íbúa á dvalarheimili í Bruyere Villages í Ottawa í Kanada, þeir hjóluðu 14.271 kílómetra. Akureyringarnir lögðu að baki 11.945 kílómetra á þeim fjórum vikum sem keppni stóð.

Ásta Þorsteinsdóttir sjúkraþjálfari segir árangurinn góðan í ár og liðsmenn Hlíðar hafi bætt sig síðan í fyrra þegar þeir hjóluðu ríflega níu þúsund kílómetra. Áður hafa þeir lent í 3., 4. og 5. sæti.

Ásta Þorsteinsdóttir sjúkraþjálfari, Inga Dóra Halldórsdóttir, aðstoðamaður standa við hjólið …
Ásta Þorsteinsdóttir sjúkraþjálfari, Inga Dóra Halldórsdóttir, aðstoðamaður standa við hjólið hans Einars.

„Þetta var virkilega gaman, frábær árangur og ég er mjög stolt af hópnum,“ segir hún.

Rúmlega 50 manns voru í liði Hlíðar en sumir hjóluðu meira en aðrir, mættu tvisvar á dag til að bæta kílómetrum við fyrir lið sitt. Hjólað er á sérstökum hjólum og hægt að fylgjast með á skjá fyrir framan þau upptökum frá ýmsum löndum, landslagi, borgum og bæjum.

Hreyfing gerir öllum gott

„Hreyfingin hefur góð áhrif á líkamann, hún eykur úthald og liðleika, dregur úr verkjum og stirðleika og hefur góð áhrif á hjarta og æðakerfið. Hún bætir líka meltingu og svefn þannig að hreyfing gerir öllum gott,“ segir Ásta.

Hún segir að mikil stemning sé þegar keppnin er í gangi. „Það er ótrúlega gaman að sjá hvernig hún vekur keppnisskapið hjá fólki og fær það til að hjóla meira og meira. Þeir hörðustu koma tvisvar á dag og jafnvel þrisvar. Góður liðsandi var í hópnum og Þegar við eygðum möguleikann á að lenda í öðru sæti kepptust allir við að hjóla sem mest,“ segir Ásta.

mbl.is