Innlent | mbl | 21.11.2021 | 12:36

Kostar sitt að ráða erlenda hjúkrunarfræðinga

Álagið er mikið á Landspítalanum og hefur uppsögnum á meðal hjúkrunarfræðinga fjölgað verulega. Ljósmynd/Landspítalinn

Aðspurð segir Guðrún Björg Sigurbjörnsdóttir, staðgengill framkvæmdastjóra hjúkrunar á Landspítala, talsverðan kostnað fylgja því að ráða erlenda hjúkrunarfræðinga til spítalans. Eins og fram hefur komið í fréttum undanfarið skoðar spítalinn nú að fara þá leið til þess að bregðast við mönnunarvanda á spítalanum.

„Jú, þau þurfa að vera með tungumálakunnáttuna og við þurfum að leggja mikið í það en starfsaðlögunin tekur líka lengri tíma. Við erum að fylgja þeim mjög stíft eftir,“ segir Guðrún í samtali við mbl.is.

Guðrún segir það hafa verið skoðað að ráða erlent starfsfólk en bendir á Landspítalinn sé nú þegar með mjög mikið af erlendu starfsfólki.

Frétt af mbl.is

„Eins og ömurleg herskylda“

Berglind Gestsdóttir, sem er ein af hjúkrunarfræðingunum sem hafa sagt upp störfum á bráðamóttöku vegna álags og ósamræmis á milli launa og ábyrgðar, sagði í samtali við mbl.is í gær að ráðningar erlendra hjúkrunarfræðinga hefðu gefið góða raun en að þeim fylgdi nokkur auka kostnaður. Ef mögulegt væri að ráðast í þau útgjöld ætti líka að vera mögulegt að greiða þeim hjúkrunarfræðingum sem nú þegar starfa á spítalanum betri laun.

„Ef að það er hægt, þá er hægt að borga okkur betri laun og þá erum við mættar,“ sagði Berglind.

Engar fleiri uppsagnir borist um helgina

Ekki hafa fleiri uppsagnir borist um helgina á meðal hjúkrunarfræðinga sem starfa á bráðamóttöku Landspítalans að sögn Guðrúnar. Uppsögnunum meðal hjúkrunarfræðinga fjölgaði verulega í síðustu viku á bráðamóttökunni eða sem samsvaraði fimm stöðugildum.

„Ég hef ekkert heyrt af neinu síðan,“ segir Guðrún.

Frétt af mbl.is

Fleiri uppsagnir á bráðamóttöku

Frétt af mbl.is

Þessi bylgja líklega dropinn sem fyllir bikarinn

Vantar enn ljósmæður

Líkt og mbl.is fjallaði um í gær hefur nú þegar ein ljósmóðir sem starfar hjá einkafyrirtæki svarað kallinu og boðist til að veita spítalanum hjálparhönd en það bráðvantar ljósmæður í bakvarðasveit.

Guðrún segist ekki hafa heyrt af neinum síðan og tekur undir að það vanti fleiri ljósmæður. „Já það væri mjög gott að fá fleiri í bakvarðasveit,“ segir Guðrún.