Innlent | mbl | 7.3.2022 | 12:00 | Uppfært 15:25

Ísland á lista óvinveittra þjóða

Ríkisstjórn Vladímírs Pútín, forseta Rússlands, hefur ákveðið að setja Ísland ásamt öðrum ríkjum á lista yfir óvinveitt ríki. AFP

Rússnesk yfirvöld hafa í dag sett Ísland, ásamt 47 öðrum ríkjum, á lista yfir „erlend ríki og landsvæði sem fremja óvinveittar aðgerðir gegn Rússlandi, fyrirtækjum þess og borgurum“. Felur aðgerðin í sér að heimilt verði að greiða aðilum í þessum ríkjum með rúblum í stað erlends gjaldeyris.

Ákvæðin ná til allra ríkisborgara og lögaðila í þeim ríkjum sem hafa tekið þátt í þvingunaraðgerðum gegn Rússlandi í kjölfar innrásarinnar í Úkraínu, að því er fram kemur í umfjöllun rússnesku fréttastofunnar TASS.

Þar segir að tilskipun þarlendra stjórnvalda veiti rússneskum ríkisborgurum og fyrirtækjum, auk ríkinu sjálfu og sveitarfélögum, sem eiga skuldbindingar gagnvart erlendum kröfuhöfum í ríkjum á listanum heimild til að greiða í rúblum. Nær þetta til greiðslna yfir 10 milljónir rúblur á mánuði.

Frétt af mbl.is

Rússar draga úr möguleikum erlendra fjárfesta

Rússneska rúblan hefur fallið nokkuð að undanförnu og kann aðgerðin að vera til þess fallin að verja hana gegn frekari falli auk þess að verja gjaldeyrisvaraforða Rússlands.

Á listanum eru Albanía, Andorra, Ástralía, Bandaríkin, Evrópusambandið (27 aðildarríki), Ísland, Japan, Kanada, Liechtenstein, Míkrónesía, Mónakó, Noregur, Norður Makedónía, Nýja Sjáland, San Marínó, Singapúr, Suður-Kórea, Svartfjallaland, Sviss, Taívan og Úkraína.