„Ekki hægt að útiloka neðansjávargos“

„Hvort að þessar hreyfingar sem mynda þessa skjálfta geti opnað leið fyrir kviku til yfirborðs, er mjög erfitt að segja af eða frá. Ég myndi ekki útiloka það. Það er alltaf möguleiki en sennilega er það ólíklegt í þessu tilfelli,“ segir Þorvaldur Þórðarson eldfjallafræðingur hjá Háskóla Íslands um möguleikann á neðansjávargosi norðaustan við Grímsey.

Greint var frá því í dag að tölu­verð skjálfta­virkni væri norðaust­an við eyjuna. Skjálfti af stærðinni 4,9 mældist um 12 kíló­metra austn­orðaust­ur af Gríms­ey kl. 04.01 í nótt.

Frétt af mbl.is

4,9 stiga skjálfti við Grímsey

Fjöldi eft­ir­skjálfta hef­ur fylgt í kjöl­farið en hrin­ur á þessu svæði eru al­geng­ar og byrjaði hrin­an í nótt um tvöleytið.

Myndu sjá óróa ef gos væri hafið

Þegar blaðamaður mbl.is spurði Lovísu Mjöll Guðmundsdóttur, náttúruvársérfræðing á jarðskjálftavakt Veðurstofunnar, hvort möguleiki væri á neðansjávargosi í tengslum við þessa atburði svaraði hún því neitandi.

Frétt af mbl.is

Hægir ekki á sjálftahrinu við Grímsey

Þorvaldur bendir á að ef gos væri komið af stað í nánd myndu þau hjá Veðurstofunni sjá óróa. „Ef þau hafa ekki séð neinn óróa þá eru litlar líkur á að það sé gos komið,“ segir Þorvaldur.

„Þvergengisbeltið sem liggur frá Melrakkasléttu eða Skjálfanda og þarna yfir í gegnum Grímsey út í Kolbeinseyjahrygg er svipað belti og liggur yfir Reykjanesskaga að því leytinu til að láréttar hreyfingar eru ráðandi eftir plötuskilunum.

Það getur alveg gerst svipað og gerðist á Reykjanesskaga að þessi tilfærsla á plötuskilunum opni leið fyrir kviku til yfirborðs, þó að það sé frekar ólíklegt í augnablikinu. Það þyrfti þá eitthvað meira að gerast en er í gangi þarna núna,“ segir Þorvaldur.

Hann nefnir að gosið hafi við Mánáreyjar á 19. öld en þær eru suðaustan við Grímsey.

• Blogga um frétt