Björn Snæbjörnsson, formaður Einingar-iðju og fyrrverandi formaður Starfsgreinasambandsins, kveðst ekki vera að íhuga framboð til forseta ASÍ. Þetta staðfestir hann í samtali við mbl.is.
Orðrómur um mögulegt framboð hans hefur verið á kreiki eftir fréttir gærdagsins um að Ragnar Þór Ingólfsson, formaður VR, Sólveig Anna Jónsdóttir, formaður Eflingar, og Vilhjálmur Birgisson, formaður Starfsgreinasambandsins og Verkalýðsfélags Akraness, hefðu öll dregið framboð sín til baka.
Fréttirnar hafa valdið miklum usla og sett þing ASÍ í uppnám.
Eins og stendur er Ólöf Helga Adolfsdóttir eini frambjóðandinn í embætti forseta. Samkvæmt dagskrá verður kosið í embættin á þingi ASÍ eftir hádegi í dag.