Liðsmönnum vélhjólagengis vísað úr landi

Tuttugu og tveimur einstaklingum var vísað úr landi í morgun vegna tengsla þeirra við vélhjólagengi. Samkvæmt heimildum mbl.is komu þessir aðilar til landsins til að sækja veisluhöld.

Líkt og mbl.is greindi frá í gær var mikill viðbúnaður á Keflavíkurflugvelli í gær vegna komu hópsins til landsins. Liggur nú fyrir að sjö voru handteknir á Reykjanesbraut í gærkvöldi og fimmtán teknir til skoðunar á landamærunum.

Frétt af mbl.is

Nokkrir í haldi á Keflavíkurflugvelli

„Við vorum með upplýsingar um að það væri von á einhverjum aðilum,“ segir Ásmundur Rúnar Gylfason, aðstoðaryfirlögregluþjónn á löggæslusviði lögreglustjórans á Suðurnesjum, í samtali við mbl.is.

Koma frá Þýskalandi og Svíþjóð

Einstaklingunum sem var vísað úr landi í dag komu með flugvélum frá Þýskalandi og Svíþjóð, en lögum samkvæmt tekur Útlendingastofnun ákvörðun um frávísun að fengnu áhættumati embættis ríkislögreglustjóra.

Seint í gær komu aðrir fimm einstaklingar til landsins sem nú eru til skoðunar hjá lögreglu.

Í frétt Vísis kemur fram að eintaklingarnir séu meðlimir vélhjólagengisins Hells Angels og undirklúbba þess.

• 2 blogg um fréttina

Bloggað um fréttina

• Jónatan Karlsson: Hvort er betri brúnn eða rauður?
• Sigurður Kristján Hjaltested: Á sama tíma...