Innlent | mbl | 22.1.2023 | 19:30 | Uppfært 19:52

Áhöfnin æðisleg

Gréta María, önnur frá vinstri, og föruneyti hennar komin inn í flugstöðina eftir maraþonsetu um borð í vél Icelandair, 19 tíma ef flug og bið vegna veðurs er talið saman. Hún ber áhöfn vélarinnar vel söguna og þakkar henni hve rólegir farþegarnir voru þrátt fyrir lýjandi bið. Ljósmynd/Aðsend

„Jú, það er mjög gott að vera komin heim,“ játar Gréta María Valdimarsdóttir, heimildarmaður mbl.is um borð í flugi Icelandair frá Seattle til Keflavíkur, en vegna veðurs þurfti vélin að standa í á tólftu klukkustund á vellinum í Keflavík áður en hægt var að hleypa farþegum frá borði vegna veðurhamsins og voru björgunarsveitarmenn til aðstoðar þegar fólk kom út úr vélinni og fetaði sig niður stigann í rokinu.

„Biðin virtist auðvitað miklu lengri eftir að við fengum að vita að þetta væri að koma, þá leið tíminn einhvern veginn hægar,“ segir Gréta María sem var við fimmta mann að koma úr vinnuferð til Los Angeles svo hópurinn hefur mátt verja drjúgum tíma um borð í flugvélum um helgina, fyrst þriggja tíma flug frá Los Angeles til Seattle, þaðan sjö og hálfur tími til Íslands og svo rúmir ellefu í bið í vélinni.

Frétt af mbl.is

Föst um borð í 17 tíma

Síðasta máltíð á miðnætti

„Það var rosalega hvasst þegar við komum út en björgunarsveitarmennirnir hjálpuðu til og svo þurftum við ekkert að ná í töskurnar heldur gátum bara farið beint út,“ heldur hún áfram, en farangurinn verður fluttur úr vélinni þegar því verður við komið vegna veðurs.

Hvernig skyldi hópurinn þá hafa það eftir þrekraunina?

„Við vorum bara óvenjulega hress en reyndar mjög svöng svo við fórum öll í pylsur, maður borðaði síðast á miðnætti að íslenskum tíma ef frá eru talin einhver nammistykki og snakkpoki,“ svarar Gréta María.

„Þessi hópmynd í flugstöðinni er nú ekkert sérstök svo ég sendi þér aðra hérna frá Los Angeles,“ segir Gréta María og lætur mbl.is í té mynd úr Staples Center, sem nú heitir víst Crypto.com Arena, en þar sáu þau vinnufélagarnir leik LA Lakers og Memphis Grizzlies. Ljósmynd/Aðsend

Hún segir farþega hafa haldið ró sinni þrátt fyrir langa bið um borð.

„Flugfreyjurnar og flugþjónarnir voru æðisleg og eiga miklar þakkir skildar fyrir hve frábær þau voru,“ segir Gréta María að lokum, komin heim í heiðardalinn eftir langt ferðalag frá Borg englanna vestur í Kaliforníu.