Íslenskum föður hefur verið gert að afhenda tvö börn sín til erlendrar móður þeirra sem er með lögheimili erlendis, samkvæmt nýlegum úrskurði Landsréttar.
Börnin eiga einnig lögheimili erlendis.
Landsréttur staðfesti á dögunum úrskurð Héraðsdóms Reykjavíkur frá 9. desember síðastliðinum í málinu.
Börnin komu hingað til lands í umgengni við föður 5. ágúst síðastliðinn og áttu þau að snúa aftur heim til móður sinnar einum mánuði síðar. Á grundvelli íslenskra barnaverndarlaga var úrskurðað að börnin skyldu vera hjá föður sínum á Íslandi í tvo mánuði til viðbótar til að tryggja hagsmuni þeirra.
Móðir barnanna skaut úrskurðinum til héraðsdóms en hún hafði einnig krafist þess að börnin yrðu afhent á grundvelli Haag-samningsins. Héraðsdómur úrskurðaði henni í vil og nú hefur Landsréttur staðfest úrskurðinn.
Börn íslenska föðurins verða með beinni aðfarargerð tekin úr umráðum hans í þessum mánuði verði þeim ekki áður komið til móðurinnar.