Lögregla leitar ökumanns sem talinn er geta varpað ljósi á tildrög bílslyssins við Norðurströnd á Seltjarnarnesi í síðustu viku.
Að sögn stöðvarstjóra lögreglustöðvarinnar við Hverfisgötu hefur lögregla eitthvað til að byggja á en ökumaðurinn er þó enn ófundinn.
Um er að ræða ökumann annars bíls en þeirra tveggja sem lentu í árekstrinum.
Átta manns voru samanlagt í bílunum tveimur sem skullu saman og allir voru fluttir á slysadeild.
Talið er að bifreiðarnar hafa skollið saman að framan og að orsök árekstursins hafi verið framúrakstur.
Grunur leikur á um að annar bílstjóranna tveggja hafi verið undir áhrifum áfengis eða vímuefna við aksturinn.
Samkvæmt upplýsingum mbl.is gefa blóðsýni úr ökumönnunum tveimur þó til kynna að svo hafi ekki verið. Lögregla vildi hvorki játa því né neita.
Tildrög slyssins eru til rannsóknar en svo virðist vera sem þriðji bíllinn hafi komið við sögu með einhverjum hætti.