Miklir staðbundnir sviptivindar á morgun gætu haft áhrif á línur Landsnets á Norðurlandi, einkum í Skagafirði, Eyjafirði og yfir í Ljósavatnsskarð frá um klukkan 11 til klukkan 16 síðdegis.
Þá gæti veðrið einnig haft áhrif á línur á norðanverðum Vestfjörðum í fyrramálið, eða frá um klukkan níu og til hádegis. Þetta kemur fram í tilkynningu Landsnets á Facebook.
Veðurstofa Íslands hefur gefið út gular og appelsínugular veðurviðvaranir fyrir morgundaginn. Það gengur í sunnan hvassviðri eða storm með talsverðri rigningu og hlýnandi veðri.
Búast má við sunnan 15 til 28 m/s, hvassast verður norðan- og norðvestan til.