Innlent | mbl | 13.12.2023 | 14:28 | Uppfært 14.12.2023 8:55

Selenskí var „merkilega brattur“

Katrín og Selenskí á blaðamannafundinum. Ljósmynd/Stjórnarráðið

Katrín Jakobsdóttir forsætisráðherra segir að skýrt hafi komið fram á leiðtogafundi Norðurlandanna og Volodimírs Selenskís Úkraínuforseta að Norðurlöndin séu afar samstillt og samtaka í stuðningi sínum við Úkraínu.

Frétt af mbl.is

Lofaði áframhaldandi stuðningi við Úkraínu

Slíkt hafi því miður ekki verið uppi á teningunum í Bandaríkjunum, sem Selenskí heimsótti nýlega, þar sem fjárstuðningur við Úkraínu sé orðinn hluti af innlandspólitíkinni og innflytjendamálum. Joe Biden Bandaríkjaforseti hafi þó m.a. stutt við bakið á honum.

Katrín ásamt leiðtogum Norðurlandanna í Ósló. Ljósmynd/Stjórnarráðið

Leiðtogafundur Evrópusambandsins hefst á morgun og bendir Katrín á flækjur þeim megin líka eftir að forsætisráðherra Ungverjalands krafðist þess að ESB-aðild Úkraínu yrði tekin af dagskrá. „Það verður spurning hvað gerist á þeim fundi,” segir Katrín sem ræddi við mbl.is að loknum blaðamannafundi í Ósló.

Frétt af mbl.is

Repúblíkanar og Orbán í eina sæng gegn Úkraínumönnum

Rússar verði dregnir til ábyrgðar

Á leiðtogafundinum í Ósló var rætt um stöðu og horfur í hernaðarátökunum og um friðaráætlun Úkraínu. Í sameiginlegri yfirlýsingu fundarins heita norrænu leiðtogarnir áframhaldandi órofa stuðningi við Úkraínu. Þar er einnig lögð áhersla á að Rússar verði dregnir til ábyrgðar fyrir stríðsglæpi sína í Úkraínu.

„Norðurlöndin lýsa yfir fullum stuðningi við friðaráætlun Úkraínu sem byggir á réttlátum og varanlegum friði og munu áfram vinna á alþjóðavettvangi að framgangi áætlunarinnar," segir í yfirlýsingunni, að því er kemur fram í tilkynningu.

Frá blaðamannafundinum í Ósló. Ljósmynd/Stjórnarráðið

Róbert Spanó leiðir verkefnið

Katrín segir að stuðningur Íslands sé annars eðlis en hinna Norðurlandanna því Íslendingar sendi ekki vígbúnað til Úkraínu heldur beiti sér frekar á pólitíska sviðinu. Nefnir hún tjónaskrá Evrópuráðsins sem var stofnuð í Reykjavík í vor. Þrátt fyrir að formennsku Íslands í Evrópuráðinu sé lokið muni það fylgja málinu eftir með Róbert Spanó sem nýkjörinn formann stjórnar verkefnisins.

Leiðtogarnir sitja við borð í Ósló. Ljósmynd/Stjórnarráðið

Að sögn Katrínar er jafnframt í fjárlögum Alþingis fyrir árið 2024 lagður til 1,7 milljarða króna stuðningur til Úkraínu. Innifalið í þeirri tölu er 500 milljóna viðbótarfé sem lagt er til í þriðju umræðu fjárlaga. Einnig mun utanríkisráðherra útbúa langtímaáætlun um stuðning Íslands við Úkraínu.

Spurð segist hún eiga von á stuðningi á þinginu vegna þessa. „Mér hefur fundist mikil samstaða á Alþingi um þessi mál. Við tókum höndum saman þegar við sameinuðumst um þennan færanlega spítala [í Úkraínu] sem núna er kominn í gagnið,” svarar Katrín, sem segir þörf á langtímaáætlun í tengslum við málefni Úkraínu líkt og Norðmenn hafa t.d. búið til.

Frétt af mbl.is

Heimsótti færanlegt neyðarsjúkrahús

Selenskí og Katrín í Ósló í dag. AFP/Heiko Junge

Hvernig var hljóðið í Selenskí í Ósló?

„Mér finnst hann bara merkilega brattur miðað við að þetta er búið að standa lengi og það gengur ýmislegt á,” svarar Katrín, og á þar m.a. við innanlandspólitíkina í Bandaríkjunum og afstöðu Ungverjalands til Úkraínu.

„Þetta einfaldar ekki stöðuna. Þó að samstaðan sé mikil þá finnur maður að þetta reynir mjög á,” bætir hún við.