Gjörólíkur búnaður í vélum Icelandair
Setja bókamerki
Búnaður til að festa hurðir í flugvélum Icelandair er allt öðruvísi en fyrirfinnst í vélum Alaska Airlines en hleri brotnaði af einni þeirra í háloftunum á dögunum.
Þetta segir Haukur Reynisson, flugrekstarstjóri Icelandair.
Í vél bandaríska flugfélagsins var um að ræða lokun á hurðargati sem er skrúfuð í en brotnaði síðan af. Í vélum Icelandir er aftur á móti venjuleg hurð fyrir neyðarútgang í gatinu, að sögn Hauks.
„Þannig að búnaðurinn sem festir hurðina hjá okkur í er gjörólíkur,” greinir Haukur frá og segir Icelandair hafa valið búnaðinn í sínar vélar með það í huga að ef flugfélagið vildi vera með fleiri en 200 sæti um borð væri mögulegt að nýta þennan neyðarútgang. Ekki hefur þó verið þörf á því þar sem sætin í vélunum eru 178 talsins.
Icelandair rekur fjórar flugvélar af sömu gerð og umrædd vél Alaska Airlines. Gerðin sem um ræðir er Boeing 737 Max 9. Vélarnar Kirkjufell, Langjökull, Hvítserkur og Baula, eru allar af þeim toga.
Plötur settar í staðinn
Spurður nánar út í fyrirkomulagið varðandi hurðirnar segir Haukur hurðir vera staðsettar beggja megin á skrokki flugvélanna frá Boeing. Alaska Airlines er með 178 sæti um borð í sínum vélum og kýs að vera ekki með þessar hurðir og þess vegna eru hurðargötin, eða plötur, settar í plássið í staðinn. Engin breyting sést að innanverðu í vélunum en ef menn horfa á þær utan frá lítur út fyrir að þar séu hurðir.
„Kom mjög fljótt í ljós“
Beðinn um að fara yfir ferlið hjá Icelandair eftir að atvikið kom upp í vél Alaska Airlines segir Haukur að fyrstu viðbrögð hafi verið að ræða við Samgöngustofu og í kjölfarið Boeing og Flugeftirlitsstofnun Evrópu, EASA, til að fá upplýsingar um til hvers var ætlast af þeim og hvort munur væri á búnaði véla Icelandair og Alaska Airlines.
„Það kom mjög fljótt í ljós á laugardaginn að þetta var gjörólíkur búnaður hjá okkur sem krafðist ekki sömu viðbragða,” svarar Haukur.
Hurðirnar skoðaðar skömmu áður
Almennt segir hann allar vélar Icelandair skoðaðar af flugvirkjum og öðru starfsfólki á hverjum einasta degi, fyrir hverja einustu brottför og því verði vitaskuld haldið áfram.
Þar fyrir utan er farið í viðhaldsverkefni sem krefjast sérskoðunar á öllum þáttum flugvélanna. Verkefnin tengjast viðhaldsáætlun sem gefin er út af Boeing og EASA. Að sögn Hauks voru hurðirnar í vélum Icelandair skoðaðar sem hluti af þessari áætlun skömmu áður en atvikið varð í vél Alaska Airlines.
Erfiðar viðræður að baki
Eina leiðin að sekta ökumenn
„Öðruvísi hefði nafnið ekki farið á samninginn“
Grindavíkurbær fækkar starfsfólki
Sérkennilegt hjá borginni
Stýrivextir Seðlabankans óbreyttir
Hættu við vopnasendingu til Ísraels