Fjölmenni safnaðist saman víða um land í gær í tilefni alþjóðlegs baráttudags verkalýðsins. Veður var með rólegasta móti framan af og sólin lagði blessun sína yfir hátíðarhöldin.
Liðsmenn Bifhjólasamtaka lýðveldisins, Sniglar, óku frá Grandagarði í átt að Háskólanum í Reykjavík og á sama tíma boðuðu verkalýðsfélögin til kröfugöngu í miðbæ Reykjavíkur.
Efnt var síðan til útifundar á Ingólfstorgi. Þar flutti Sólveig Anna Jónsdóttir formaður Eflingar tölu þar sem hún skaut föstum skotum á íslensk stjórnvöld og fagnaði starfi Eflingarfélaga. Yfirskrift baráttudagsins að þessu sinni var „Sterk hreyfing – sterkt samfélag“.