Snjómaðurinn ógurlegi var björn

Er Snjómaðurinn ógurlegi, bangsinn dularfulli, enn í Himalya-fjöllum?
Er Snjómaðurinn ógurlegi, bangsinn dularfulli, enn í Himalya-fjöllum? AFP

Breskir vísindamenn hafa komist að þeirri niðurstöðu að Snjómaðurinn ógurlegi hafi í raun verið undirtegund grábjörns. Goðsögnin um að þetta kvikindi sé á kreiki í Himalayafjöllum og víðar er þekkt um allan heim.

DNA-rannsóknir á hárum sem gerðar voru við Oxford-háskóla leiddu í ljós að þau voru sambærileg hárum fornra ísbjarna. Erfðafræðiprófessorinn Bryan Sykes segir að líklegast sé að Snjómaðurinn ógurlegi hafi verið kynblendingur ísbjarnar og grábjörns. Hann segir ennfremur í samtali við BBC að hugsanlega hafi því raunverulegt dýr ýtt undir goðsögnina um Snjómanninn.

„Ég held að björninn, sem enginn hefur séð á lífi, gæti enn verið þarna og sé skyldur ísbirni,“ segir hann.

Hárin sem rannsóknirnar voru gerðar á fundust á tveimur stöðum, í Bútan og á Norður-Indlandi, í nágrenni Himalayafjallanna. 

Enn telja sumir að Snjómaðurinn ógurlegi sé raunverulegur og reglulega eru birtar ljósmyndir af fótsporum sem talin eru eftir þessa goðsagnakenndu veru.

mbl.is

Bloggað um fréttina