Ragnar Freyr Ingvarsson, betur þekktur sem Læknirinn í eldhúsinu, bauð í vetrarveislu á dögunum þar sem hann reiddi fram ljúffenga langeldaða lambakássu með flauelsmjúku kartöflupúre.
Inni á síðu læknisins má finna mun ítarlegri leiðbeiningar ásamt myndum en hér er uppskriftin og njótið vel.
Ljúffeng langelduð lambakássa með flauelsmjúku kartöflupúré
Þetta er í raun eldamennska eins og hún er einföldust. Í raun bara að raða í pott og bíða.
Fyrir átta
- 2,5 kg sagaður lambaframpartur
- 2 rauðir laukar
- 4 sellerísstangir
- 5 hvítlauksrif
- 6 gulrætur
- 500 g sveppir
- 5 lárviðarlauf
- 100 g smjör
- 3 l lambasoð
- 2 msk. Vilt og ótamið - kryddblanda frá Kryddhúsinu/Lækninum í Eldhúsinu
- 1 dós tómatpúre
- 1/2 flaska rauðvín
- 1 msk. Lea & Perrins Worchestershire-sósa
- 1 kg kartöflur
- 150 g smjör
- 250 ml rjómi
- 1/3 múskathneta
- salt og pipar
Aðferð:
- Fyrsta skrefið var að velta öllum lambabitunum upp úr hveiti, salti, pipar og smá hvítlauksdufti. Hveitið hjálpar kássunni að þykkna þegar yfir lýkur.
- Bitarnir voru svo steiktir í smjöri þangað til að þeir voru fallega brúnaðir. Þá voru þeir settir til hliðar og grænmetið steikt. Þessi mynd er nú eiginlega bara upp á rómantíkina sem mér fannst vera í loftinu á sunnudaginn þegar bylurinn lamdi gluggana.
- Skar svo hvítlauk, rauðlauk og sellerí niður í smáa bita.
- Gulrótunum leyfði ég bara að vera í stórum bitum. Bætið við lárviðarlaufum.
- Þegar grænmetið er mjúkt og eldhúsið ilmar dásamlega er öllu kjötinu bætt saman við.
- Ég hafði opnað flösku fyrir einhverjum dögum síðan og af einhverjum skussaskap ekki klárað þannig að tveir þriðju hlutar hennar voru eftir - svona á maður ekki að fara með góð vín. En á móti kemur að maður á gott vín til að nota í matinn.
- Hellti saman við og sauð upp áfengið.
- Svo ein dós af tómatpúre.
- Þessi blanda frá mér og Krydd- og Tehúsinu kom á markaðinn nú fyrir jól og var fyrst og fremst hugsuð fyrir villibráð - en hún er einnig ljúffeng með íslensku lambakjöti sem að mínu mati mætti nánast kalla villibráð þar sem lömbin ganga á heiðar og éta villigrös þangað til þeim er slátrað að hausti.
- Þarna kennir ýmissa grasa - þurrkuð bergmynta, rósmarín, hvítlaukur, einiber, rósapipar, svartur pipar, allrahanda og margt fleira - allt hugsað til að lyfta hráefninu upp á efstu hæðir.
- Þegar suðan var komin upp skellti ég sveppunum saman við. Fleytti allri froðu ofan af (það er froðan sem kemur upp á yfirborðið þegar kássan hitnar). Setti svo pottinn inn í 170 gráðu heitan ofn og þar var hann látinn kúra í 3,5 tíma.
- Svo sauð ég nokkrar flysjaðar kartöflur í söltuðu vatni, setti svo í annan pott ásamt smjöri og rjóma, salti og pipar.
- Raspaði svo 1/3 af múskathnetu saman við kartöflupúreið.
- Úr varð þessi dásamlega mús/púre - sem var flauelsmjúk.
- Kássan ilmaði dásamlega þegar hún kom úr ofninum. Ég fleytti mestu af fitunni ofan af (geymi hana að sjálfsögðu til betri tíma - sem grunn í sósu, súpu eða næstu kássu - inn í frysti).
- Kássan reyndist hrein dásemd. Fullkomin á vetrardögum sem þessum.
- Svo er um að gera að nýta afganginn daginn eftir - kássan batnar bara á næstu dögum þegar bragðið þróast og kryddin jafna sig saman.
- Verði ykkur að góðu.
mbl.is/Ragnar Freyr Ingvarsson