Skandinavískur innanhússtíll hefur verið yfirburðavinsæll síðustu ár. Stíllinn einkennist af hvítu, mínímalisma með ljósum pastellitum og köldum tónum. Svart, hvítt, grátt og náttúruleg efni eins og ljós viður ráða ríkjum og marmari er áberandi.

Plöntur eru vinsælar sem og listaverk í ljósum litum eða teikningar. Okkur á matarvefnum finnst skandinavísk hönnun ákaflega falleg og eldhús í þeim stíl guðdómleg en viljum þó gjarnan sjá frakkara litaval og aðeins meiri persónuleika.

Nr 1. Stór ljós flötur
Stór ljós flötur getur verið ljós innrétting, ljósir veggir eða ljósar flísar. Ef innréttingin er í lit væri hún ljósgrá, svört, dökkblá eða fölbleik.

Nr 2. Ljós viðargólf og/eða ljós viðarhúsgögn 
Ljós viðargólf eru vinsæl í Skandinavíu og þá sérstaklega í Danmörku. Gólfið gefur eldhúsinu hlýju á móti hvíta ljósa fletinum. Einnig eru stór viðarborð og bekkir vinsæl. Eldhúsborðið er þá einnig stofuborð og miðja heimilisins undir heimalærdóm, vinnu eða spilakvöld.

Nr 3. Hangandi ljós
Hangandi ljós í hráum stíl, hvort sem það er iðnaðarútlit eða fínni ljós er mikilvægt að þau hangi niður yfir eldhúseyju ef slíkur lúxus er til staðar. Ef ekki þarf ljósið að hanga yfir matarborðið.

Nr 4. Nútímalist Ljósmyndir í svörtum römmum eru vinsælar í skandinavískum eldhúsum. Einnig eru plaköt í ljósum litum, jafnvel pastellitum vinsæll.

Nr 5. Opnar hillur eða glerskápar 
Opnar hillur úr brons, ljósum við eða hvítu efni eru nánast skylda í lekkerum skandinavískum eldhúsum. Þær gefa eldhúsinu léttara útlit og um leið má raða fallegum hlutum, uppáhaldsstellinu, blómum eða jafnvel myndum á þær.