Hátíðarkrans sem kemur öllum í betra skap

Ljósmynd/Berglind Hreiðasdóttir

Sumar fæðutegundir eru til þess fallnar að gera allt betra og þar er ostur mjög framarlega í flokki. Þess vegna er það nánast skylda að skella í þennan dásamlega hátíðarhring sem er fylltur með Dala-Auði og ætti að valda alsælu ...

Uppskriftin er eftir meistara Berglindi Hreiðars á Gotteri.is sem klikkar ekki fremur en fyrri daginn.

Hátíðarhringur með Dala-Auði

  • 8 plötur af frosnu smjördeigi (tæpir 2 kassar)
  • trönuberjasulta
  • 50 g saxaðar pekanhnetur
  • 2 stk. Dala-Auður
  • pískað egg
  • gróft salt
  • saxað rósmarín

1. Þíðið frosnar smjördeigsplöturnar (ég keypti frosnar frá Findus og notaði tæplega 2 pakka).

2. Skerið plöturnar langsum, horn í horn, til að búa til 16 þríhyrnda hluta.

3. Raðið þeim á bökunarpappír í hring með breiðari endann inn að miðju og setjið alltaf hornið á næsta vel yfir hlutann sem er á undan.

4. Smyrjið með sultu við miðjuna, stráið pekanhnetunum yfir og raðið osti allan hringinn (ég skar hvern ost í 8 hluta og raðaði þétt).

5. Togið síðan mjórri endann á smjördeiginu yfir ostinn og festið í innanverðan hringinn, endurtakið þar til allt smjördeigið hefur verið sett yfir ostinn

6. Penslið með pískuðu eggi og stráið salti og rósmarín yfir.

7. Bakið í 20 mínútur og leyfið hitanum aðeins að rjúka úr. Osturinn bráðnar svolítið út fyrir hringinn en það er allt í lagi og þið getið skorið hann frá þegar hringurinn hefur aðeins náð að kólna.

8. Hugmyndin kemur frá Tasty og hægt er að horfa á myndband frá þeim hér sem sýnir aðferðina vel. Ég hagræddi þó aðeins uppskriftinni og íslenskaði.

Ljósmynd/Berglind Hreiðasdóttir
mbl.is