Við hér á matarvefnum erum einlægir aðdáendur túnfisksalats – eins og reyndar þjóðin öll ef marka má vinsældir þess hér á vefnum.
Hér er uppskrift frá Berglindi Hreiðars á Gotteri.is sem við gefum hæstu einkunn. Epli eru nefnilega ótrúlega sniðug í svona salöt – hvort sem þú elskar lauk eður ei.
Túnfisksalat með eplum
- 7 egg
- 2 dósir túnfiskur í vatni (2 x 185 g)
- ½ laukur
- 1 grænt epli
- 1 msk. sítrónusafi
- 240 g Hellmann‘s majónes
- Aromat og pipar
Aðferð:
- Harðsjóðið eggin, kælið, skerið smátt niður og setjið í stóra skál.
- Pressið vatnið af túnfisknum og setjið í sömu skál og eggin.
- Næst má saxa laukinn og eplið smátt niður (flysjið eplið fyrst), kreista sítrónusafann yfir og setja síðan í skálina.
- Að lokum fer majónesið saman við og öllu blandað varlega saman með sleif og kryddað eftir smekk.
- Geymið í kæli fram að notkun og berið fram með góðu kexi eða brauði.
Ég saxaði eplið frekar smátt niður en þið getið að sjálfsögðu stýrt stærðinni á bitunum á því sem og lauknum eftir því sem ykkur finnst best. Ég er svolítið mikill saxari oft og tíðum og vil oftast hafa allt mjög smátt saxað, ha ha ha!
Ljósmynd/Berglind Hreiðarsdóttir