Matur | mbl | 5.10.2023 | 6:01 | Uppfært 13:44

Uppáhaldsfiskréttur Ásu Regins með suðrænu ívafi

Ása Regins ljóstrar upp sínum uppáhaldsfiskrétti sem er með suðrænu ívafi og allir geta gert. Samsett mynd

Hér er á ferðinni uppskrift að fiskrétti með suðrænu ívafi. Rétturinn er úr smiðju Ásu Regins en hún deildi uppskriftinni á Instagram á dögunum. Ása segir að þessi fiskréttur sé uppáhalds hjá sér. Þetta er sáraeinföld uppskrift sem allir geta gert og rétturinn er svo sannarlega með suðrænu ívafi og bragðast ómótstæðilega vel. Sjáið hvernig Ása lagar fiskréttinn á Instagram hér fyrir neðan.

Fiskréttur með suðrænu ívafi

Fyrir 4

3 stk. þorskflök (ca. 800 g)
1-2 p litlir tómatar
1 stk. laukur
1 stk hvítlaukur
Fersk basilíka eftir smekk
Kapers eftir smekk
Ólífur eftir smekk
Ólífuolía eftir smekk

Aðferð:

Byrjið á að skera tómatana í helminga og saxið laukana smátt.
Hitið vel af olíu á pönnu á vægum hita.
Bætið við lauknum og hvítlauknum við ásamt tómötunum.
Þrýstið létt á tómatana til að fá safann úr þeim.
Lokið pönnunni og leyfið innihaldinu að malla.
Þegar tómatarnir eru orðnir mjúkir bætið þið þorskflökunum á tómatbeðið ásamt kapers, ólífunum og basilíkunni.
Setjið lokið á og leyfið öllu að bakast í rólegheitunum á vægum hita.
Takið lokið af og ausið safanum yfir fiskinn og þannig verður hann svo ómótstæðilega safaríkur og góður.
Njótið.