Shonda Rhimes opnar heimili sitt í nýjustu útgáfu hönnunartímaritsins Architectural Digest. Rhimes, sem er konan á bak við farsæla bandaríska sjónvarpsþætti á borð við Grey's Anatomy og Scandal, skrifar að sér hafi í fyrstu fundist húsið ljótt og eitthvað rangt við það. Hún keypti þó húsið þar sem hún sá góða sögu í því, sögu sem endaði vel.
Húsið sem er í Kaliforníu er nú allt annað en ljótt eins og sést á myndum úr innlitinu. Rhimes skildi eitt herbergi eftir nánast eins og það var og er það skrifstofan hennar. Búið er að opna á milli hæða inni þannig að meiri birta flæðir um húsið.
Það þurfti þó ekki bara að laga húsið að innan því ytra byrði hússins var ekki fínt. Í ljós kom að framhliðinni hafði verið breytt um miðja síðustu öld og með smá rannsóknavinnu var hægt að endurgera upphaflegt útlit hússins sem var byggt árið 1923.