Listamaðurinn Sísí Ingólfsdóttir hefur sett einstaklega fallega íbúð sína við Snorrabraut á sölu. Aðalástæða þess er hún fann ástina í örmum Birgis Arnar Guðjónssonar, Bigga löggu, og eru þau búin að kaupa sér húsnæði saman.
Sísí hefur slegið í gegn með listaverk sín þar sem hún dregur fram plebbaskap þjóðarinnar í útsaumi og á prenti.
Íbúð Sísíar við Snorrabraut er 130 fm að stærð og er í húsi sem byggt var 1942. Gengið er inn í íbúðina frá Auðarstræti. Íbúðin er björt og falleg og renna eldhús og stofa saman í eitt. Parket er á gólfum og er allt hvítmálað í aðalrýmum íbúðarinnar. Í stofunni er ljós sófi og hansa-hillur sem eru alltaf mikil heimilisprýði.