Vigdís Finnbogadóttir, fyrrverandi forseti Íslands, mætti á tískusýningu „International Young Fashion Designers Showcase Tour“ á föstudag í Listasafni Reykjavíkur, Hafnarhúsi. Auk hennar voru fjölmargir gestir sem tilheyra tísku- og hönnunargreininni hér á landi. Sýningin sem er alþjóðleg sýningarröð með fatahönnuðum frá Hong Kong, Kína, Panama, Tansaníu og Íslandi er hugarefni Annie Wu. Wu, sem tilnefnd var sem ein af tíu áhrifamestu konum Kína árið 2002, stóð fyrir tískusýningunni í Hafnarhúsinu á föstudag. Markmiðið með sýningunni er að beina sjónum að ungum og upprennandi fatahönnuðum.
Almenningur gat skoðað sýninguna í Listasafni Reykjavíkur, Hafnarhúsinu á laugardag. Sýningin var formlega opnuð á föstudag fyrir boðsgesti. Þeir sem sýndu hönnun sína voru: Hildur Yeoman, Veronice Angel, Jarel Zhang Sing, Chin Lo, Janne, Kanoe, Kenny Li, Kemi Kalikawe, Mary Yu, Mountain Yam,Tony Vergara og QIQI.
Smartland birti viðtal við Annie Wu á föstudag.
Kristín Aðalbjörg Árnadóttir, fyrrverandi sendiherra Íslands í Kína og núverandi sendiherra jafnréttismála á vegum utanríkisráðuneytisins, segist heilluð af sýningunni á föstudag. „Ég held og vona að þessi vettvangur sem Annie Wu er að leggja drög að muni fela í sér aukin tækifæri fyrir íslenska hönnuði á erlendri grundu.“
Kristín kynntist Annie Wu þegar hún var sendiherra í Kína á sínum tíma. Þetta verkefni er eitt af þeim verkefnum sem utanríkisráðuneytið kemur að. Staða Kristínar í ráðuneytinu er ný. „Ríkisstjórnin setur jafnréttismál í forgrunn. Við viljum hvetja til framfara bæði hér á landi og erlendis. Auka skilning á sjónarmiðum okkar, mikilvægi jafnréttis fyrir þróun samfélaga, hagsæld og hamingju.
Steinunn Sigurðardóttir hélt ræðu við opnun sýningarinnar. Hún blés ungum hönnuðum von í brjóst. Steinunn er með víðtæka reynslu á sviði tísku og hönnunar. Er með sitt eigið merki, en hefur einnig reynslu af því að starfa fyrir Ralph Lauren og Calvin Klein svo eitthvað sér nefnt.
Áslaug Snorradóttir sá um veitingar fyrir sýninguna sem voru fallegar og framandi.