Markaðsráðstefnan Krossmiðlun var haldin í fimmta sinn á Grand Hótel Reykjavík á dögunum. Hún var að þessu sinni helguð Creative Data, eða skapandi notkun gagna í markaðssetningu. Sem fyrr var það auglýsingastofan Pipar\TBWA sem stóð að ráðstefnunni en um 350 manns sóttu viðburðinn. Pipar\TBWA fagnaði vel heppnaðri Krossmiðlun með teiti í lok dags í höfuðstöðvum fyrirtækisins við Guðrúnatún. Þar var margt góðra gesta og góð stemmning.

Vigdís Jóhannsdóttir, aðstoðarframkvæmdastjóri Pipars\TBWA, hafði yfirumsjón með skipulagningu ráðstefnunnar. Að hennar sögn tókst afar vel til, og vel var látið af öllum erindum sem þóttu fróðleg, skemmtileg og hvetjandi.

„Þetta voru ólík erindi en mjög gagnleg hvert á sinn hátt og gáfu manni góða innsýn í margt af því helsta sem við þurfum að hafa í huga og tileinka okkur í auglýsinga- og markaðsmálum í dag. Við hlökkum til að máta það sem þarna kom fram við okkar viðskiptavini,“ segir Vigdís.

Fyrirlesarar á Krossmiðlun voru bæði íslenskir og erlendir. Meðal þeirra voru Baker Lambert og Sami Salmenkivi, yfirmenn hjá TBWA auglýsingastofunni á heimsvísu, og Sue B. Zimmerman, frumkvöðull og sérfræðingur í markaðssetningu á samfélagsmiðlum.