Lilja Pálma mætti glóandi eins og sólin

Kvikmyndin Agnes Joy var frumsýnd í gærkvöldi í Háskólabíói við mikinn fögnuð. Lilja Pálmadóttir hestakona í Skagafirði mætti ásamt syni sínum, Pálma Kormáki. Þar var líka Ottó Guðjónsson lýtalæknir og eiginkona hans Guðbjörg Sigurðardóttir og Elísabet Ronaldsdóttir, einn virtasti klippari Íslands. 

Silja Hauksdóttir leikstýrir myndinni en handritið gerði hún í samstarfi við Mikael Torfason, Göggu Jónsdóttur og Jóhönnu Friðriku Sæmundsdóttur. 

Með aðalhlutverk í myndinni fara Björn Hlynur Haraldsson, Þorsteinn Bachmann, Katla Margrét Þorgeirsdóttir, Donna Cruz og Kristinn Óli Haraldsson sem oftast er kallaður Króli. 

Agnes Joy fjallar um Rannveigu sem hefur að undanförnu upplifað kulnun í bæði starfi og einkalífi. Það er ekki nóg með að hún sé einmana, hjónabandið við eiginmanninn Einar sé á leið í hundana og að hún sé föst í starfi sem hún hatar heldur á hún í stöðugum útistöðum við dóttur sína Agnesi, sem er uppreisnargjörn og krefst þess að fara sínar eigin leiðir þrátt fyrir boð, bönn og sígildar móðurlegar ráðleggingar. Þegar nýr nágranni, leikarinn Hreinn, birtist á tröppunum er eins og vonbrigði og gremja hversdagsins hverfi um stund hjá mæðgunum. Það leiðir til þess að fjölskyldan neyðist til að endurmeta hlutina og horfast í augu við glænýjar áskoranir.