Það er ekki á hverjum degi sem forstjórar félaga í Kauphöll Íslands taka sér stöðu á grillinu í Grósku en það gerðist í gær þegar Margrét Tryggvadóttir forstjóri Nova grillaði hamborgara fyrir svanga gesti sem komin voru á BBQ & Pitch. Viðburðurinn var haldinn af KLAK sem er helsti stuðningsaðili við frumkvöðla og nýsköpun á Íslandi og heldur árlega nokkra viðskiptahraðla auk frumkvöðlakeppninnar Gulleggið.
BBQ & Pitch er hluti af viðskiptahraðlinum Startup SuperNova sem er samstarfsverkefni Nova og KLAK þar sem leitast er við að byggja upp viðskiptalausnir ætlaðar eru alþjóðamarkaði og tóku þátttakendur í hraðlinum sviðið og æfðu sínar lyftukynningar sem þau munu svo endurtaka á fjárfestadeginum 9. september sem einnig verður haldinn í Grósku.
Nova er bakhjarl Startup SuperNova og þess má geta að Margrét er önnur konan á Íslandi til að stýra félagi í íslensku Kauphöllinni en Nova var skráð í Kauphöllina 21. júní sl. og kynna þau í dag sitt fyrsta ársfjórðungsuppgjör.
„Við hjá Nova viljum hafa góða áhrif á samfélagið og vera leiðandi í tæknibreytingum og síðan út frá samfélagsbreytingum með tilkomu tækninnar. Nova elskar frábærar hugmyndir og við viljum svo sannarlega taka þátt í að koma hugmyndum framtíðarinnar á framfæri. Við höfum lagt áherslu á nýsköpun innan Nova sem og stutt við grasrótina og er Startup SuperNova frábær vettvangur þar sem þátttakendur fá tækifæri til þess að koma hugmyndum sínum á framfæri,“ segir Margrét Tryggvadóttur, forstjóri Nova.
Við hlið Margrétar við grillið stóðu Svana Gunnarsdóttir, annar eiganda og framkvæmdastjóri Frumtaks og Kristján Schram hjá Instrúment en þau taka bæði þátt í viðskiptahraðlinum sem mentorar og fyrirlesara en auk þeirra var þar stofnandi og framkvæmdastjóri PLAIO, Jóhann Guðbjargarson en hann tók þátt í Startup SuperNova í fyrra. Hætt var við að grillið stæli senunni enda fólk vel búið og í miklu stuði að munda tangirnar.
„Stemningin var algjörlega frábær og mætingin framar vonum. Teymin hafa tekið miklum framförum og er frábært að sjá samheldnina sem myndast hefur innan hópsins. Hamborgararnir runnu út aðeins hraðar en við gerðum ráð fyrir en við lofum jafnvel enn betra partíi og kynningum 9. september og hvetjum alla áhugaverða fjárfesta og aðra til að taka daginn frá strax,“ segir Ása María Þórhallsdóttir verkefnastjóri Startup SuperNova.