Ármann Jakobsson, prófessor í íslenskum fornbókmenntum, sýnir á sér óvænta hlið í jólabókaflóðinu í haust. Hann leggur nú lokahönd á glæpasögu sem nefnist Útlagamorðin. Sagan hefst á því að ungur maður sem enginn veit hver er finnst látinn í húsagarði í litlum bæ sem nefnist Reykir.
Nýstofnuð morðrannsóknardeild lögreglunnar fer þegar á staðinn en er vandi á höndum. Bærinn er fullur af erlendum ferðamönnum, kattarmorðingi gengur laus, þarna er nýopnaður skemmtigarður, tvær systur virðast ráða öllu sem máli skiptir – og ein úr lögregluteyminu á ekkert sérstaklega góðar minningar úr þessum smábæ. Útlagamorðin kemur út hjá Bjarti síðar í haust. Ármann hefur áður sent frá sér skáldsögur og fræðibækur en snýr nú frá því að skrifa um víg í miðaldabókmenntum og að glæpum í nútímanum.