Smartland Mörtu Maríu | Frægð | mbl | 8.4.2020 | 17:16

Safna peningum svo Gugga geti jarðað Jóa sinn

Jóhann Traustason og Guðbjörg Inga Guðjónsdóttir voru mjög ástfangin en myndin var tekin 2015. mbl.is/Eggert Jóhannesson

Jóhann Traustason, eða Jói eins og hann var kallaður, féll frá 31. mars síðastliðinn en hann var með krabbamein í lifur. Hann var þekktur í samfélagi manna ásamt eiginkonu sinni, Guðbjörgu Ingu Guðjónsdóttur, eða Guggu eins og hún er kölluð. Þau áttu í mikilli baráttu við áfengi og vímuefni en fyrir tæplega áratug náðu þau að verða edrú.

Nú hafa vinir þeirra Jóa heitins og Guggu efnt til söfnunar til að hægt sé að jarða hann á sómasamlegan hátt.

„Ég vil þakka Krissu vinkonu minni fyrir að stofna þessa síðu. Það er ótrúlega erfitt að eiga ekki fyrir útförinni. Ég sakna þín elsku hjartað mitt,“ segir Gugga inni á söfnunarsíðunni á Facebook.

Guðbjörg Inga Guðjónsdóttir eða Gugga eins og hún er kölluð. mbl.is/Eggert Jóhannesson

Gugga sagði í viðtali við Smartland 2015 að hún væri mjög þakklát fyrir að vera edrú:

„Þetta er það lengsta sem Jói hefur verið edrú samfellt en ég var einu sinni edrú í sjö ár. Munurinn á þeim tíma og núna er sá að núna er ég hamingjusöm en það var ég ekki þá,“ segir Gugga í viðtali við Smartland Mörtu Maríu og bætti við að nú vilji hún láta kalla sig Guðbjörgu. „Til að segja skilið við þetta gamla líf.“

Jói sagði skilið við Bakkus á frídegi verkalýðsins hinn 1. maí 2011 og Guðbjörg fylgdi í kjölfarið. Hætti alveg 18. maí sama ár.

Guðbjörg segir muninn á edrúmennskunni nú og áður vera þann að þau séu loks farin að taka leiðsögn.

„Nú gerum við það sem okkur er sagt að gera. Tökum leiðsögn í fyrsta sinn og hermum eftir þeim sem eru búnir að vera edrú lengi. Við hellum upp á kaffi, heilsum fólki, stólum upp eftir 12 spora fundi og svona,“ segir Guðbjörg, sem fór árlega í áfengismeðferðir frá árinu 2003 til 2011. „Ég hljóp bara alltaf út úr þessum meðferðum,“ sagði hún í viðtalinu 2015.