Netsala hefur víða mikil áhrif. Sölusíður sem markaðssetja vörur fyrir ungt fólk og færa vörurnar beint upp að dyrum freista margra þessi jólin.
Víðast hvar eru verslanir að draga saman seglin og færa sig í auknum mæli á netið. Síður eins og Asos virðast vera að springa út, enda hefur vöruúrvalið aldrei verið meira og ferlarnir í fyrirtækinu til fyrirmyndar. Hraðsendingar á milli landa frá fyrirtækjum eins og Asos taka 3 daga og kostnaður er rúmlega 10 pund. Ef þú verslar yfir ákveðna tölu er frí heimsending en þú færð vörurnar líklegast ekki fyrir jólin.
Síðasta útspil fyrirtækisins var að bjóða 30% afslátt fyrir jólin. Þannig má finna dýrindis kasmírbuxur, náttslopp og fylgihluti undir 10.000 kr. fyrir jólin.
Þeir sem hafa ekki verslað á netinu áður verða að gera ráð fyrir að borga virðisauka af vörunni en reiknivél tollsins er auðveld viðureignar. Þannig má gera ráð fyrir því að ef varan kostar 10.000 kr. til landsins með flutningi borgirðu 2.400 í vsk. af vörunni.
Supreme-aðdáendur eru að nota Grailed til að finna það heitasta frá vörumerkinu í dag. Grailed er þekkt fyrir að bera merki sem erfitt er að fá í búðum.