Buffaló-skórnir eru mættir í Kringluna

Á árunum 1998 til 1999 var enginn maður með mönnum nema eiga upphækkaða strigaskó frá merkinu Buffalo. Skórnir þóttu bæði smart og svo voru þeir himnasending fyrir lágvaxna. Hljómsveitin Skítamórall, sem var mjög töff á þeim tíma, var til dæmis mikið í Buffalo-skóm. 

Svo tók við tímabil þar sem Buffalo-skór þóttu um það bil það hallærislegasta sem til var í heiminum. En nú kveður við annan tón. Hvítir Buffalo skór eru nefnilega mættir í Kaupfélagið í Kringlunni og verða þeir fáanlegir í takmörkuðu upplagi. Það eru þó ekki bara Buffalo-skór sem eru að koma eins og himnasending inn í hausttískuna því þykkbotna skór almennt verða vinsælir í vetur. Það er nettur hippafílingur í þeim og svo koma þeir vel út við stuttar buxur með útvíðum skálmum. 

„Nú geta þeir sem fengu aldrei Buffalo hér í gamla daga eða fengu eftirlíkingar og eru væntanlega komnir með fjárráð keypt sér ekta Buffalo skó,“ segir Brynja Dan Gunnarsdóttir, markaðsstjóri S4S, sem rekur Kaupfélagið.