Það eru fáir sem hafa haft eins mikil áhrif í heimi tískunnar og Wallis Simpson gerði. Simpson var fædd árið 1896 og dó árið 1986. Hún var betur þekkt sem hertogaynjan af Windsor.
Ástarævintýri hertogans og hertogaynjunnar af Windsor er án efa sögulegasta ástarsaga síðustu aldar. Vafalaust hefur fátt á síðustu öld orðið bresku þjóðinni slík hneykslunarhella sem það þegar Játvarður VIII Bretlandskonungur tilkynnti þegnum sínum í desember árið 1936 að hann myndi afsala sér konungdómi til að kvænast konunni sem hann elskaði. Lengst af þögðu bresk blöð um málið þótt samband konungs og Wallis Simpson væri á allra vitorði. Það lá hins vegar ljóst fyrir að breska þjóðin myndi aldrei samþykkja að Játvarður konungur, sem var æðsti maður kirkjunnar, kvæntist tvífráskilinni bandarískri konu.
Tatler fjallaði nýverið um bestu tískuaugnablik hertogaynjunnar.
Það sem einkenndi stíl hennar var að hún var alltaf með fallega uppsett hárið. Hún klæddist kjólum sem voru þröngir í mittið og mjög vel klæðskerasaumaðir. Hún var í einföldum fatnaði og notaði nælur og annað skraut til að ýta undir persónulegan stíl sinn.
Eins átti hún auðvelt með að setja saman fallega liti. Sem dæmi blár kjóll með gulu belti sem kom einstaklega fallega út á henni.