Verslunin Harrods í Bretlandi sendi tilkynningu til viðskiptavina í dag, þar sem tilkynnt er um lokun verslunarinnar, frá sjö í kvöld á staðartíma. Þetta er gert vegna kórónuveirunnar.
Í tilkynningu Harrods, sem Michael Ward, framkvæmdastjóri fyrirtækisins, skrifar undir, segir orðrétt að þeir hafi ávallt haft velferð samfélagsins í fyrirrúmi. Að viðskiptavinir og viðskiptafélagar séu í öndvegi og því hafi sú ákvörðun verið tekin að loka.
Bent er á að Harrods hafi upphaflega byrjað sem matvöruverslun og því hafi sú stefna verið tekin að halda áfram á þeirri braut. Hægt verði að nálgast matvörur og lyf áfram, eða þar til fyrirtækið neyðist til að loka því líka.
Í tilkynningunni kemur fram að vonast sé eftir því að viðskiptavinir haldi áfram að heimsækja heimasíðu Harrods. Eins ætla þeir að vera áfram sýnilegir á samfélagsmiðlum.
Þetta þykir stór frétt í viðskiptalífi Breta. Enda á fyrirtækið sér 170 ára sögu og lifði af í gegnum seinni heimsstyrjöldina svo dæmi séu tekin.
Táknmynd Harrods er einmitt sú hugmynd að þeir lifa alltaf af. Í lok tilkynningarinnar segir að fyrirtækið voni að viðskiptavinir, viðskiptafélagar og aðrir hafi það sem best og Harrods vonist til að sjá sem flesta fljótt aftur.
Á síðu Harrods má lesa tilkynninguna í fullri lengd.