Fær ekki að skarta kórónu í ár

Litlar líkur eru á að Katrín hertogynja fái að skarta kórónu í ár en síðast bar hún kórónu í desember á síðasta ári. Þá bar hún Lovers Knot kórónuna við svartan flauelskjól úr smiðju Alexander McQueen. 

Hinir konungbornu bera aðeins kórónur við tækifæri á borð við stórveislur eða opinbera kvöldverði í tengslum við heimsóknir ríkisins og lítið hefur verið um slíkar samkomur undanfarið.

Katrín hertogynja hefur aðeins tíu sinnum borið kórónu á þeim níu árum sem hún hefur sinnt konunglegum störfum. 

Í nýútgefinni fréttatilkynningu frá höllinni kemur fram að ekki verða haldnir stórir viðburðir á vegum konungsfjölskyldunnar það sem eftir er af árinu. Aðrir minni viðburðir verða haldnir í samræmi við ríkjandi reglur hverju sinni um viðbrögð vegna kórónuveirunnar.