Sagt að fara í brjóstastækkun eftir krýninguna

Indverska leikkonan Priyanka Chopra varð fræg eftir að hún vann titilinn Ungfrú heimur árið 2000 aðeins 18 ára gömul. Hún fór fljótalega að reyna fyrir sér í kvikmyndabransanum og stakk leikstjóri upp á því að hún færi í brjóstastækkun og aðrar fegrunaraðgerðir. 

„Eftir smáspjall sagði leikstjórinn/framleiðandinn mér að standa upp og snúa mér í hring fyrir hann. Ég gerði það. Hann horfði á mig vel og lengi, mat mig og stakk því næst upp á að ég færi í brjóstastækkun, léti laga á mér kjálkana og stækka á mér rassinn,“ skrifaði Chopra í sjálfsævisogu sína Unfinished. „Hann sagði að ef ég ætlaði mér að verða leikkona þyrfti að „laga“ hlutföllin og hann þekkti frábæran lækni í LA sem hann gæti sent mig til. Þáverandi umboðsmaður minn var samþykkur.“

Chopra fór sem betur fer ekki eftir ábendingunum sem hún fékk og skipti um umboðsmann. Í viðtali við Metro segir hún að athugasemdirnar sem hún fékk þegar hún var ung hafi þótt eðlilegar í skemmtanabransanum. Hún var hvött til þess að tjá sig ekki um málið vegna framtíðar sinnar. 

„Þetta er svo eðlilegt að þetta kemur ekki upp í samtölum,“ sagði Chopra. Hún sagði þetta hafa átt sér stað snemma á ferlinum og hún aldrei sagt frá af hverju hún gekk út.  

Priyanka Chopra var krýnd Ungfrú heimur árið 2000. . REUTERS

Chopra skorti lengi hugrekkið til þess að standa með sjálfri sér. Hún fékk oft að heyra það að hún ætti ekki að vera erfið, hún væri ný í bransanum og það væri ekki gott fyrir hana að vera með slæmt orðspor. Núna er Chopra hins vegar að nálgast fertugt og veit hversu óheilbrigð umræðan í garð kvenna er. 

„Ég féll líka fyrir þessu, jafnvel þótt ég líti á mig sem nútímalega klára stelpu. Með tímanum skildi ég að ég var skíthrædd,“ sagði Chopra.

Priyanka Chopra er heimsfræg leikkona í dag. AFP

• Blogga um frétt