Hinn 6. júlí síðastliðinn frumsýndi tískuhúsið Balenciaga 51. Couture Collection á París hátísku vikunni (e. haute couture week), en á tískupallinum sáust þónokkur fræg andlit.
Í byrjun sýningarinnar gengu fyrirsætur huldar svörtum andlitshlífum út á tískupallinn, en eftir það var komið að fræga fólkinu. Á meðal gesta á fremsta bekk sýningarinnar voru þau Kris Jenner, North West, Keith Urban, Offset og Tracee Ellis Ross sem fylgdust spennt með.
Langþráður draumur Kim Kardashian rættist í gær þegar hún gekk sína fyrstu tískusýningu í París. Athafnakonan hefur verið í samstarfi við tískuhúsið og hefur sést klædd sem „Balenciaga-Barbí“ síðustu mánuði.
Leikkonan Nicole Kidman klæddist silfruðum kjól, en hún kom gestum sýningarinnar skemmtilega á óvart.
Söngkonan Dua Lipa gladdi gesti í gulum kjól.
Raunveruleikastjarnan og fasteignasalinn Christine Quinn lék frumraun sína á tískupallinum á sýningu Balenciaga. Quinn skaust hratt upp á stjörnuhimininn í raunveruleikaþáttunum Selling Sunset.
Fyrirsætan Bella Hadid lét sig ekki vanta, en hún klæddist grænum kjól á sýningunni.
Að sjálfsögðu var tískugoðsögnin Naomi Campell á pallinum, en hún klæddist svörtum kjól sem var heldur betur stórglæsilegur.