Íþróttir | Íslenski fótboltinn | mbl | 15.9.2020 | 9:50 | Uppfært 20:29

Kemst Ísland á fjórða Evrópumótið í röð?

Íslenska liðið æfði á Laugardalsvelli í gær. mbl.is/Árni Sæberg

Íslenska kvennalandsliðið í knattspyrnu leikur sinn fyrsta leik í undankeppni EM í tæpt ár er Lettland kemur í heimsókn á Laugardalsvöllinn næstkomandi fimmtudag. Átti Ísland að leika fjóra leiki í sumar en var þeim frestað vegna kórónuveirunnar.

Ísland lék þrjá leiki í æfingamótinu Pinatar-bikarnum í mars, en síðasti keppnisleikur var 8. október á útivelli, einmitt gegn Lettlandi. Ísland vann sannfærandi 6:0-útisigur í Lettlandi og er töluvert sigurstranglegra liðið á heimavelli gegn sömu þjóð.

Ísland er með fullt hús stiga eftir þrjá leiki, eins og Svíþjóð, og tróna Norðurlandaþjóðirnar á toppnum með níu stig, fimm stigum á undan Ungverjalandi og Slóvakíu sem hafa leikið leik meira.

Sara Björk Gunnarsdóttir varð Evrópumeistari á dögunum. Hún er að sjálfsögðu í hópnum, eins og Gunnhildur Yrsa Jónsdóttir. mbl.is/Árni Sæberg

Á meðal markaskorara í Lettlandi voru þær Fanndís Friðriksdóttir og Margrét Lára Viðarsdóttir. Verða þær ekki með að þessu sinni þar sem Fanndís er ófrísk og Margrét Lára lagði skóna á hilluna skömmu eftir leikinn.

Nokkrir leikmenn lettneska liðsins leika hér á landi en þær Eliza Spruntule, Olga Sevcova og Kalkina Miksone voru allar í byrjunarliðinu gegn Íslandi í október. Leika þær allar með ÍBV og eru á meðal bestu leikmanna liðsins.

Liðið sem vinnur riðilinn fer beint á EM og þær þrjár þjóðir sem enda í öðru sæti og eru með bestan árangur gegn liðunum í fyrsta, þriðja, fjórða og fimmta sæti í riðlinum. Það gæti því dugað Íslandi að enda í öðru sæti til að komast á lokamótið í Englandi 2022, en mótið átti upprunalega að fara fram 2021.

Á þriðjudaginn eftir viku bíður íslenska liðsins erfiðara verkefni en þá kemur Svíþjóð í heimsókn í toppslag. Er Svíþjóð með markatöluna 16:1 eftir leikina þrjá og Ísland 11:1. Endaði Svíþjóð í þriðja sæti á HM í Frakklandi á síðasta ári og er með gríðarlega sterkt lið.

Sveindís Jane Jónsdóttir (lengst til hægri) gæti leikið sinn fyrsta landsleik. mbl.is/Árni Sæberg

Eru leikirnir við Lettland og Svíþjóð síðustu heimaleikir Íslands í undankeppninni en íslenska liðið leikur við það sænska á útivelli 27. október, Slóvakíu úti 26. nóvember og loks Ungverjaland á útivelli 1. desember.

Tveir leikmenn gætu leikið sinn fyrsta landsleik í verkefninu nú í september en þær Sveindís Jane Jónsdóttir hjá Breiðabliki og Barbára Sól Gísladóttir Selfossi eru í hópnum í fyrsta skipti. Þá hafa þær Karólína Lea Vilhjálmsdóttir Breiðabliki og Fylkiskonan Cecilía Rán Rúnarsdóttir leikið einn landsleik hvor.

Berglind Björg Þorvaldsdóttir kemur inn í hópinn á ný en hún missti af landsleikjunum á Spáni í mars þegar hún komst ekki þangað frá Ítalíu vegna útbreiðslu kórónuveirunnar, en hún samdi á dögunum við Le Havre í Frakklandi. Þá koma varnarmaðurinn Anna Björk Kristjánsdóttir, miðjumaðurinn Alexandra Jóhannsdóttir og markvörðurinn Sonný Lára Þráinsdóttir inn í hópinn á ný en þær voru ekki í hópnum í mars.

Frá æfingu liðsins á Laugardalsvelli. mbl.is/Árni Sæberg

Fanndís Friðriksdóttir er í barneignafríi og Hildur Antonsdóttir er frá vegna meiðsla. Þær Sigríður Lára Garðarsdóttir, Natasha Anasi, Berglind Rós Ágústsdóttir, Anna Rakel Pétursdóttir og Ingibjörg Valgeirsdóttir voru einnig í hópnum í mars en eru ekki valdar að þessu sinni.