Siguróli Kristjánsson, betur þekktur sem Moli, heimsótti mörg af minni bæjarfélögum landsins í sumar þar sem hann stóð fyrir bæði knattspyrnuæfingum, studdi við bakið á þjálfurum í bæjarfélaginu og setti upp fjölbreyttar fótboltabúðir.
Alls tóku um 600 til 700 krakkar þátt í verkefninu sem KSÍ setti á laggirnar sumarið 2019 og var Siguróli því að heimsækja bæjarfélögin í annað sinn í sumar.
„Þetta er verkefni sem hófst á síðasta ári,“ sagði Siguróli í samtali við Morgunblaðið. „Síðasta sumar heimsótti ég 33 staði á landsbyggðinni og í ár gerði ég gott betur og heimsótti 34 staði. Verkefnið var öðruvísi í ár enda tíminn mun knappari vegna kórónuveirufaraldursins. Ég komst ekki af stað fyrr en í maí og svo kom aftur stopp í ágúst. Ég náði hins vegar að taka góðan hring um Vestfirðina í ágústmánuði þannig að þetta blessaðist allt að lokum.“
Siguróli heimsótti 31 byggðarlag á ferðalagi sínu um landið og hélt þar fótboltanámskeið fyrir krakka frá samtals 34 byggðarlögum. Staðirnir voru Borg í Grímsnesi, Breiðdalsvík, Búðardalur, Djúpivogur, Eyrarbakki, Flateyri, Flúðir, Grundarfjörður, Hofsós, Hólmavík, Höfn, Kirkjubæjarklaustur, Kjalarnes, Mývatnssveit, Ólafsvík, Patreksfjörður, Raufarhöfn, Seyðisfjörður, Skagaströnd, Stokkseyri, Stykkishólmur, Stöðvarfjörður, Suðureyri, Súðavík, Varmahlíð, Vík í Mýrdal, Vogar, Vopnafjörður, Þingeyri, Þorlákshöfn og Þórshöfn. Til Patreksfjarðar komu líka krakkar frá Tálknafirði og Bíldudal og til Raufarhafnar komu krakkar frá Kópaskeri.
Viðtalið við Siguróla er í heild sinni í Morgunblaðinu í dag en hér fyrir neðan eru myndir frá öllum viðkomustöðum hans á ferðalaginu um landið í sumar