Manchester United hefur lánað framherjann James Wilson til Aberdeen í Skotlandi og verður hann þar út yfirstandandi tímabil.
Wilson er 22 ára sóknarmaður sem hefur verið á mála hjá United allan sinn feril. Hann skoraði tvö mörk í fyrsta úrvalsdeildarleik sínum á Englandi fyrir United í lokaleik tímabilsins 2013/2014 og þótti afar efnilegur, enda aðeins 18 ára á þeim tíma.
Hann tók svo þátt í 17 leikjum tímabilið eftir en hefur síðan þá meira og minna verið að láni hjá hinum og þessum neðrideildarliðum.
Wilson hefur skorað alls fjögur mörk í 20 leikjum fyrir United en á síðustu leiktíð var hann að láni hjá Sheffield United í ensku B-deildinni.