Enska D-deildarfélagið Oldham Athletic hefur ráðið Ástralann Harry Kewell sem nýjan knattspyrnustjóra. Kewell gerði garðinn frægan sem leikmaður Liverpool og Leeds á sínum tíma.
Kewell hefur stýrt Crawley og Notts County í neðri deildum Englands síðan hann lagði skóna á hilluna. Er hann sjöundi stjóri Oldham á síðustu tveimur árum, en liðið endaði í 19. sæti D-deildarinnar á tímabilinu.
Paul Scholes, fyrrverandi leikmaður Manchester United, stýrði Oldham í sjö leikjum á síðasta ári en sagði starfi sínu lausu eftir aðeins rúman mánuð í starfi.