„Hann spilar fyrir Manchester United, sem gerir þetta snúið, en á svona stundum erum við knattspyrnumenn bara manneskjur, sem standa saman,“ sagði Jürgen Klopp, knattspyrnustjóri Liverpool, á blaðamannafundi í gær um baráttu Marcus Rashford í að hjálpa fátækum börnum.
Rashford er 22 ára sóknarmaður United en hann fékk á dögunum MBE-orðu breska ríkisins frá Elísabetu Bretlandsdrottningu eftir að hafa sannfært stjórnvöld um að taka U-beygju í stefnumálum sínum og sjá til þess að börn, sem lifa við erfiðar aðstæður, fái gefins mat í skólanum.
„Það sem Marcus hefur gert er ótrúlegt og ég vona að móðir hans sé mjög stolt af honum. Ég þekki hann ekki, en ég er stoltur af honum!“