Rekinn frá nýliðunum

Xisco Munoz hefur verið leystur frá störfum sínum sem knattspyrnustjóri enska félagsins Watford þegar aðeins sjö umferðum er lokið í ensku úrvalsdeildinni.

Nýliðar Watford töpuðu í gær 0:1 fyrir Leeds United og þótti stjórn félagsins þegar nóg um þrátt fyrir að Watford sé með 7 stig í 14. sæti úrvalsdeildarinnar, fjórum stigum fyrir ofan fallsæti.

Xisco tók við stjórnartaumunum hjá Watford í desember á síðasta ári og stýrði liðinu í 2. sæti ensku B-deildarinnar, sem tryggði liðinu sæti í ensku úrvalsdeildinni á ný eftir aðeins árs fjarveru.

„Stjórninni finnst sem frammistöður liðsins að undanförnu gefi skýrar vísbendingar um að þær séu á niðurleið þegar samheldnin liðsins ætti að vera á sýnilegri uppleið.

Félagið mun ávallt vera Xisco þakklátt fyrir hans þátt í að liðið komst upp á síðasta tímabili og við óskum honum góðs gengis í framtíðinni. Félagið mun ekki tjá sig frekar um málið þar til tilkynning um nýjan þjálfara liggur fyrir.“

• Blogga um frétt