Fernandinho, leikmaður enska knattspyrnufélagsins Manchester City, hefur samið við uppeldisfélag sitt á Brasilíu, Athletico Paranaense. Þetta segir íþróttafréttamaðurinn Fabrizio Romano.
Þá er Kalvin Philips, leikmaður Leeds United og enska landsliðsins, á leiðinni til City og verður hann arftaki Fernandinho á miðjunni hjá Englandsmeisturunum.
Fernandinho kom til City árið 2013 frá Shaktar Donetsk í Úkraínu. Hann tók við fyrirliðabandinu af David Silva þegar sá síðarnefndi yfirgaf Manchester árið 2020, og vann fjölmarga titla, þar á meðal fimmta Englandsmeistaratitil sinn með City á síðustu leiktíð.
Brasilíumaðurinn tilkynnti í apríl síðastliðnum að hann myndi fara frá City í lok leiktíðar og gengur nú til liðs við uppeldisfélag sitt á Brasilíu á frjálsri sölu þar sem hann skrifar undir tveggja ára samning.