„De Gea er ekki nógu góður“

Roy Keane, fyrrum fyrirliði Manchester United, sem starfar nú sem sparkspekingur sagði að Manchester United þyrfti að finna sér nýjan markmann ef liðið ætlaði að komast aftur í fremstu röð.

Keane var spekingur í setti hjá sjónvarpsstöðinni ITV þegar úrslitaleikurinn í enska bikarnum var spilaður í gær. Leiknum lauk með sigri Manchester City á nágrönnum sínum í Manchester United, 2:1.

David de Gea, markvörður Manchester United, var illa staðsettur í öðru marki City-manna sem varð til þess að frekar máttlítið skot Ilkay Gündogan endaði í markinu.

Keane, sem lengi hefur talað fyrir því að United þurfi nýjan markmann, sagðist vera orðinn þreyttur á að þurfa að benda á þetta.

„Félagið þarf nýjan markmann og heimsklassa framherja. Ég er orðinn þreyttur á að segja þetta. De Gea er ekki nógu góður, hann verður ekki sá sem mun koma liðinu aftur í það að vinna titla.“ sagði Roy Keane.

David de Gea leit ekki vel út í öðru marki Ilkay Gündogan í gær. AFP/Adrian Dennis

• Blogga um frétt