Enski knattspyrnumaðurinn John Stones, miðvörður Manchester City, fór meiddur af velli í upphafi vináttulandsleiks Englands og Belgíu á Wembley í Lundúnum í gærkvöldi.
Stones hélt um nárann á sér þegar hann fór af velli eftir aðeins níu mínútna leik og því ríkir óvissa um hvort hann geti tekið þátt í stórleik Man. City gegn Arsenal næstkomandi sunnudag.
Áður hafði liðsfélagi hans Kyle Walker haltrað af velli í 0:1-tapi Englands fyrir Brasilíu í vináttulandsleik í síðustu viku.
Walker stífnaði aftan í læri en samkvæmt Sky Sports standa vonir til þess að hann verði klár í slaginn á sunnudag.
Þriðji varnarmaðurinn, Manuel Akanji, dró sig þá úr svissneska landsliðshópnum fyrir nýafstaðinn landsleikjaglugga vegna ónefndra meiðsla og er ekki víst hvort hann verði búinn að jafna sig um helgina.