Knattspyrnumaðurinn Ben White, varnarmaður Arsenal, hefur ekki spilað fyrir enska landsliðið síðan á HM 2022 í Katar þegar hann yfirgaf herbúðir liðsins.
Gareth Southate, landsliðsþjálfari Englands, greindi frá því á fréttamannafundi fyrir leikina gegn Brasilíu og Belgíu fyrir nokkrum dögum að Edu, íþróttastjóri Arsenal, hafi tjáð honum að White vildi ekki vera valinn í verkefni landsliðsins.
Yfirlýst ástæða eftir HM 2022 voru persónulegar ástæður og greindu enskir miðlar frá því að kastast hefði í kekki milli Whites og Steves Hollands, aðstoðarþjálfara enska landsliðsins.
Dyrnar virðast þó vera opnar fyrir White en Southgate segir það vera í höndum leikmannsins.
„Ben White verður að ákveða sig. Dyrnar okkar eru opnar. Ég væri mjög til í að fá hann aftur í landsliðshópinn,“ sagði Southgate.