Haustið er rétt handan við hornið og hefur GameTíví snúið aftur á skjáinn eftir sumarfrí.
Í gær fór fyrsti þáttur Mánudagsstreymsins í loftið eftir sumarfrí, þar skemmta Óli Jóels, Dói Critical, Tryggvi og Kristján Einari áhorfendum í beinni útsendingu.
Þá fóru þáttastjórnendur til dæmis yfir helstu fréttir úr tölvuleikjaheiminum, skoðuðu myndir úr sumarfríinu og fóru af stað með spurningakeppni.
Sömu þættir og voru á dagskránni fyrir sumarfrí halda áfram í haust en búast má við atriðum sem minna á gömlu GameTíví-þættina ásamt því meira fjöri í komandi þáttum.
„Það verða sömu þættir áfram hjá okkur og við ætlum bara að bæta í fjörið frá því sem var,“ segir Óli Jóels í samtali við mbl.is.
„Til dæmis vorum við í GameTíví í stúdíói í gær og ætlum að halda því áfram, ásamt því að vera með fasta liði eins og fréttir, spurningaleiki og spurningu vikunnar. Blanda inn nokkrum atriðum eins og þau voru í gömlu GameTíví-þáttunum.“
Dagskráin verður komin á fullt í næstu viku en nokkrir þættir snúa aftur í þessari viku.
Babe Patrol munu taka upp fjarstýringarnar á miðvikudagskvöldið og Queens á sunnudagskvöldið en Gameveran snýr aftur í byrjun næsta mánaðar.
Hér fyrir neðan má horfa á endursýningu af Mánudagsstreyminu en það er einnig að finna á Twitch-rás GameTíví.