Spezia hafði betur gegn Salernitana á útivelli í lokaumferð ítölsku B-deildarinnar í fótbolta í kvöld, 2:1. Sveinn Aron Guðjohnsen lék allan leikinn með Spezia og lagði upp sigurmark í blálokin.
Cedric Gondo kom Salernitana yfir á 30. mínútu en Luca Mora jafnaði í uppbótartíma í fyrri hálfleik. Fabio Maistro fékk sitt annað gula spjald og þar með rautt hjá Salernitana á 62. mínútu og Spezia nýtti sér liðsmuninn.
Frakkinn M'Bala Nzola skoraði sigurmarkið á 90. mínútu eftir undirbúning frá Sveini og Spezia fagnaði sigri. Spezia hafnaði í 3. sæti deildarinnar með 61 stig og er á leiðinni í sex liða umspil um sæti í A-deildinni.