Balotelli skoraði fimm í lokaumferðinni

Ítalinn Mario Balotelli skoraði fimm mörk fyrir Adana Demirspor, lið hans og Birkis Bjarnasonar, í lokaumferð  tyrknesku úrvalsdeildarinnar í knattspyrnu í dag en það vann þá yfirburðasigur á Göztepe Izmir, 7:0.

Balotelli skoraði þrennu á aðeins ellefu mínútum í fyrri hálfleik og bætti svo við tveimur mörkum á átta mínútum um miðjan þann síðari. Þar með skoraði hann 13 mörk í deildinni á tímabilinu og stóð uppi sem markahæsti leikmaður liðsins. Sjö markanna komu í síðustu fimm umferðunum.

Birkir var allan tímann á varamannabekk Adana Demirspor að þessu sinni en hann lék 32 af 38 leikjum liðsins í deildinni og skoraði fimm mörk. Adana Demirspor var nýliði í deildinni og kom mjög á óvart, var í baráttu um Evrópusæti lengi vel en gaf eftir seinni hlutann og endaði í níunda sæti af átján liðum.

• Blogga um frétt