Okkar menn geta lært mikið af Alfreð

Freyr Alexandersson, þjálfari danska úrvalsdeildarliðsins Lyngby, segir að sínir menn geti lært mikið af Alfreð Finnbogasyni sem æfir með liðinu þessa vikuna.

Freyr var aðstoðarþjálfari karlalandsliðsins í fótbolta á sínum tíma og þeir Alfreð þekkjast því vel. Alfreð er laus undan samningi hjá Augsburg í Þýskalandi og leitar sér að nýju liði en hann hefur verið mikið orðaður við Hammarby í Svíþjóð.

„Alfreð er leikmaður með meira en 100 leiki í Búndeslígunni og við þekkjumst vel frá því ég starfaði með íslenska landsliðinu. Hann er án liðs og þarf að halda sér í formi og telur Lyngby vera félag með ágætis gæði og aðstöðu, þannig að við erum ánægð með að hafa Alfreð hérna í heimsókn," segir Freyr á heimasíðu Lyngby.

„Það hefur líka góð áhrif á aðra leikmenn okkar, sérstaklega þá ungu, að vera með leikmann í þessum gæðaflokki á æfingum. Þó Alfreð hafi verið þjakaður af meiðslum á seinni árum þá er hann svo sannarlega leikmaður úr hærri gæðaflokki með gríðarlega reynslu, sem okkar ungu menn eiga að geta lært mikið af," segir Freyr Alexandersson.

• Blogga um frétt