Harry Kane skoraði beint úr aukaspyrnu 40 metra færi í stórsigri Bayern München á útivelli gegn Union Berlin í þýsku deildinni í knattspyrnu í dag. Englendingurinn skoraði sitt fertugasta mark á tímabilinu.
Þrátt fyrir vonbrigða tímabil heima fyrir eru Bæjarar komnir í undanúrslit Meistaradeildarinnar og sigruðu Union Berlin auðveldlega í dag. Leon Goretzka kom gestunum á bragðið áður en Kane bætti við marki í uppbótartíma fyrri hálfleiks. Gamla brýnið Thomas Müller skoraði tvö mörk í síðari hálfleik og Frakkinn ungi Mathys Tel eitt. Yorbe Vertessen lagaði stöðuna fyrir heimaliðið undir lok leiks.
Bayern heldur 2. sætinu þremur stigum á undan Stuttgart en Union er einungis þremur stigum frá fallsæti.